Föstudagsmorguninn 24. júní árið 2016 vöknuðu gestir tónlistarhátíðarinnar Glastonbury í miðju forarsvaði. Skipuleggjandi hátíðarinnar kvaðst aldrei hafa upplifað aðra eins rigningartíð.

Ekki leið á löngu uns símaskjáir tóku að lýsast upp í tjöldum með fréttum af því sem margir sáu sem óeiginlegt þrumuský. Niðurstaða þjóðaratkvæðagreiðslu, sem hafði farið fram daginn áður, lá fyrir. Bretar höfðu kosið að ganga úr Evrópusambandinu.

Ekki aðeins himnarnir grétu á Glastonbury sumarið 2016 heldur gestirnir líka; samkvæmt könnun The Times höfðu 83% hátíðargesta kosið gegn útgöngunni.

Þegar Chris Martin, söngvari Coldplay, steig á svið þakkaði hann gestum fyrir að umbera úrhellið, drulluna og hrun landsins.

Fimm hundruð kílómetrum norðar í Sunderland kvað við annan tón. Tölur frá hafnarborginni voru fyrsta vísbending um öruggan sigur útgöngusinna. „Hlutirnir verða að fara að breytast,“ sagði Jim Oliver, fyrrverandi málari, við blaðamann Guardian. Hann kvaðst binda vonir við að framtíðin væri björt, en 61% íbúa Sunderland kaus …